أخبار الأهلي : نجم الزمالك يهاجم ثنائي الأهلي
أخبار الأهلي : هاجم أيمن يونس، نجم الزمالك ومنتخب مصر السابق، الثنائي أحمد فتحى، ورمضان صبحي، بتفضيلهما عرض بيراميدز ورفض الاستمرار مع النادى اللقلعة الحمراء.
وقال أيمن يونس فى برنامجه الفيلسوف عبر إذاعة أون سبورت إف إم، “أحمد فتحى حبيبى وهو عارف كدا بس الغلط مينفعش منقولش عليه غلط، كنت ساكت مش عايز أتكلم بس الناس بتقولى اشمعنى بتقول تصرف كارتيرون غلط والباقيين لأ، وعشان كدا هقول رأيى لأول مرة فى قرار أحمد فتحى بالرحيل عن الاهلى والانضمام لبيراميدز .”
وأضاف أيمن يونس، “أحمد فتحى نجم كبير إتربى فى الإسماعيلى ولكن فى الأهلى شاف العز كله، خير الأهلى على أحمد فتحى واضح زى الشمس، إعلانات وبطولات وتاريخ ومنتخب مصر، مينفعش يا أحمد تيجى تقول ياجماعة ده آخر عقد ليا وده احتراف ولازم أمشى، أنت غلطان يافتحى من هنا لحد أسوان مشى .”
وتابع نجم الزمالك السابق، “كلمة عرض بيراميدز أكبر متتقالش للأهلى يافتحى، حتى لو المقابل المادى لبيراميدز أربع أضعاف عرض الأهلى متقولش كدا، اللى عملته فى الأهلى يخليك تقول مش عايز حاجة تانى من الدنيا وعلى فكرة الاحتراف يافتحى هو الالتزام والانضباط والانتماء أيضاً الانتماء فى الافعال والأقوال.. من حق جمهور الأهلى يزعل منك لأنه بعد ماكبرك تعمل معاهم كدا.. كل ده مالوش مخزون عندك يا أحمد، المفروض رصيد الأهلى عندك كبير، مش حسبة فلوس يابنى. “
أخبار الأهلي : أيمن يونس يهاجم رمضان صبحي
وعن رمضان صبحي قال:” الناس بتقولى أنت معترض على موقف كارتيرون وكنت مرحب بتصرف رمضان صبحى، ده مش صح يا جماعة الموقف مختلف، أنا عارف أن رمضان صبحى غلط مفيهاش كلام، الأهلى منحه قبلة الحياة ووافق على احترافه فى الدورى الإنجليزى مثلما ننادى مع كل اللاعبين بعد تألق محمد صلاح وتريزيجيه وأحمد حجازى”.
وأضاف أيمن يونس، “اللاعبون فى أوروبا يلهثون وراء التاريخ وليس الأموال، نجوم أوروبا يبحثون عن وضع أسمائهم فى كتاب تاريخ كرة القدم، هم ليسوا صنيعية يبحثون عن الفلوس مثل حال بعض نجوم الكرة فى مصر، أول شىء يفكرون فيه وضع الأموال فى جيبوهم دون البحث عن أى شىء آخر.”
شارك