تعود النجمة الكبيرة نبيلة عبيد إلى الدراما الإذاعية مرة أخرى بعد غياب سنوات طويلة، حيث تعاقدت مؤخرا مع الهيئة الوطنية للإعلام برئاسة الإعلامى أحمد المسلمانى ومعه رئيس الإذاعة المصرية عبد الرحمن البسيونى، على تقديم رواية “يا ابنتى لا تحيرينى معك”، على أثير الإذاعة، وبدأ بالفعل المخرج والمؤلف أحمد فتح الله على كتابة السيناريو والحوار استعدادا لتقديمها.
اقرأ أيضا: شباب الطفيلة يبدعون في فن الجداريات ضمن معسكرات الحسين للعمل والبناء 2026
تليفزيون اليوم السابع استغل هذه العودة، وتحدث مع نبيلة عبيد عن تفاصيل هذا الرجوع، وعدد من محطاتها الفنية وذكرياتها، وأشياء أخرى كثيرة تناولها اللقاء.
عن العودة وسر اختيار هذا العمل، أكدت النجمة الكبيرة نبيلة عبيد، أنها قريبة بشدة من أسرة الأديب الراحل إحسان عبد القدوس، وكانت تتصل بنجله لأمر ما، حتى قال لها في الهاتف:”يا ابنتى لا تحيرينى معك”، ما أثار إعجابها وفضولها على حد قولها، حيث قالت: ” تربطنى علاقة قوية وطيبة بعائلة الأستاذ إحسان عبد القدوس الله يرحمه.. حرمه وأولاده.. أنا اتصلت بابنه مش فاكرة عشان إيه بالظبط.. فقالى ابنه: “يا ابنتى لا تحيرينى معك”، قولتله: “الله ابعتهالى على طول، ومن هنا بدأنا الاتصالات لتنفيذ العمل.. واللى هيخرجه ويكتب السيناريو والحوار الأستاذ أحمد فتح الله، وهو مخرج قوى جدا فى الإذاعة”.
وتابعت حديثها عن الرواية، قائلة: “المسلسل بيناقش الإحساس بالجيل الحالى، وجيل الأم والأب مع شباب الأيام دى.. يعنى مهم جدا إن الرواية دى تتقدم فى الوقت ده، عشان نشوف الجيل ده، ونتعامل معاه إزاى.. ونظبط حاجات جايز ماتكونش مظبوطة.. عشان فيه أجيال كتير بتيجى، تتعلم إزاى يتعاملوا مع بعض.. عشان برضه فيه حاجات سلبية وفيه حاجات مش أحسن حاجة”.
نبيلة عبيد: هذه تفاصيل مسلسلى “يا ابنتى لا تحيرينى معك”
وأضافت النجمة نبيلة عبيد قائلة: “اسم المسلسل وعنوانه موضح الموضوع شوية، أكيد البنت عندها مشكلة.. فأكيد الأم حيرانة معاها، وتعبانة.. وهنا الربط بين الجيلين، الجيل اللى هو بتاعنا ده.. وجيل الشباب.. وربنا يوفقنا ونقدم حاجة كويسة للجمهور، وتبقى دى رسالة حلوة.. إلى جانب ده كله تكون الرسالة دى بتعالج مشكلة”.
وأكدت أن اسم المسلسل، والذى أثار استغراب عدد من المتابعين، قد لفت نظرها منذ البداية، موضحة أن هذه الأسماء هى طبيعة الكاتب والروائى الكبير إحسان عبد القدوس في كل رواياته، وهى مسمياتها المثيرة التي تثير الفضول للقراءة والمعرفة.
وأضافت: “دايما روايات إحسان عبد القدوس أسماؤها كدة غريبة، حتى في كل أعمالى اللى قدمتها معاه، مثل “ولا يزال التحقيق مستمرا” و”سقطت في بحر العسل”، “الراقصة والطبال”، “الراقصة والسياسى”، وحاجات كتيرغيرها.. يعنى غرابة هذا الاسم مش جديدة على أسماء روايات إحسان عبد القدوس.. يعنى تسمع الاسم يشدك على طول.. وتبقى متشوق تعرف الموضوع اللى جوه إيه؟”.
وكشفت نبيلة عبيد أن عودتها للإذاعة المصرية من خلال رواية “يا ابنتى لا تحيرينى معك”، شجعتها على البحث عن رواية أخرى لتقدمها على الشاشة الصغيرة لتعود بها لعالم الدراما التليفزيونية، حيث علقت: “بالفعل عودتى للإذاعة شجعتنى أشوف رواية تانية أقدمها للتليفزيون عند أسرة أستاذ إحسان عبد القدوس.. أو حد آخر يكون عنده نص كويس ينفع نقدمه على الشاشة الصغيرة”.
نبيلة عبيد تكشف طبيعة علاقتها بـ نادية الجندى
وفى حوارها كشفت النجمة نبيلة عبيد عن طبيعة العلاقة التي جمعتها بالنجمة الكبيرة نادية الجندى، بل ردت على العديد من الشائعات التي طالت هذه العلاقة على مدار سنوات طويلة، وعلقت قائلة: “مفيش غيرة بينى وبين نادية الجندى.. غيرة ليه؟!.. اللون اللى نادية بتقدمه أنا مابقدموش.. أنا عندى لون وسكة وهى عندها لون وسكة فهيكون فيه غيرة ليه؟”.
وقالت: “سبب المشاكل خلال فترة ما، من تدخل بعض الأشخاص في نقل كلام غلط مش مظبوط بيقولولها هى كلام مش حقيقى.. أنا استمريت 3 سنوات مش عارفة هى المشكلة إيه؟!.. لحد ما مرة قاعدة معايا صحفية اسمها عائشة صالح مش عارفة موجودة دلوقتى ولا لأ كانت في المصور.. طرحت عليا السؤال ده.. وقالت لى حصل وحصل قولتلها ليه؟؟ قولتلها أنا ماعنديش أى فكرة”.
وتابعت النجمة حديثها: ” فبدأت أتتبع بقى.. اللى بيجولى ويتكلموا ويعملوا معايا موضوعات أو كدة.. ياخدوا كلام ويوصلوه بشكل خاطئ .. لمدة 3 سنين أنا ماكنتش مشغولة غير بشغلى ومشغولة بتحضيراتى والحاجات دى كلها.. ومرة سألتنى السؤال ده وبطريقة بقى عايزة تاخد منى سبق صحفى.. قلت لها أنا ما أعرفش حاجة خالص.. قالتلى إزاى ده مالى الجرايد.. قولتلها لا لا مفيش خالص.. أنا من ناحيتى ماعنديش.. بس يجوز الناس اللى بيتكلموا معاها هما اللى بيحرفوا الكلام وهما اللى قاصدين يعملوا كدة.. بالنسبة لـ نادية أو أى حد تانى.. ماعنديش غير ثقتى فى ربنا وشغلى والناس اللى بتعامل معاهم”.
وكشفت النجمة الكبيرة نبيلة عبيد عن كواليس مهمة في مشوارها الفنى، خاصة التي تتعلق بعلاقتها مع زميلتها النجمة الكبيرة نادية الجندى، حيث حكت عن موقف جمعهما فى أحد المهرجانات الكبرى بحضور النجم الكبير يحيى الفخرانى، حيث قالت: ” كان فيه مرة حفل توزيع جوائز بمهرجان ما كبير، وكنت حاضرة أنا ونادية الجندى، ودخلت هى قبل منى وكان موجود يحيى الفخرانى وكان فيه ممثلين تانيين”.
وأضافت عبيد قائلة: “فأنا قلت لنادية هبوسك قدام الناس، عشان ماتتخضش على المسرح فقالتلى أه أه.. فهى دخلت حيت الجمهور وأنا دخلت حييت الجمهور وأدورت كدة، راحت جاية فى حضنى، وبعدين يحيى الفخرانى وقتها ضحك وقال دى المصالحة الوطنية… وبعدين نادوا على اسمها ونادوا على اسمى.. وبعدين البوسة دى خلت الناس كلها تشهد وتعرف إن مفيش في قلبى حاجة ولا فى يوم كان فيه حاجة بينا”.
وبسؤالها عن أقرب الأعمال لقلبها، خاصة بعد مشوارها الطويل الحافل بالأعمال السينمائية، حيث قالت عبيد: “والله كل الرويات والأفلام اللى أنا عملتها قريبة منى، بداية من روايات إحسان عبد القدوس.. زى مثلا (العذراء والشعر الأبيض) و(سقطت في بحر العسل).. و(لا يزال التحقيق مستمرا).. وخد بالك كل الحاجات دى من تأليف أستاذ إحسان عبد القدوس، كنت أقوله أنا عايزة رواية يقولى خدى أقرى دى.. هو اللى كان دايما يقدملى الروايات اللى شايفها تصلح لتقديمها فى السينما.. يعنى مثلا زى “الراقصة والطبال” و”الراقصة والسياسى”، هو برضه اللى قايلى عليها وكذلك فيلم “أيام فى الحلال”.
وأضافت عبيد قائلة: “فأنا كنت بودى الروايات بقى لمؤلفين يكتبوا السيناريو كنت ببقى دقيقة أوى فى النقطة دى.. وكنت دايما بكون واثقة طالما معايا سيناريست كبير، ومخرج كبير وكذلك صاحب الرواية كاتب كبير فبكون واثقة إننا بنقدم حاجة كبيرة”.
نبيلة عبيد تكشف سبب موافقتها على فيلم “توت توت” رغم قلة كلامها فيه
وبسؤالها عن ذكرياتها مع فيلم «توت توت»، والتى قدمت من خلاله دور فتاة تعانى من تراجع عقلى، فيتم اغتصابها حتى تحمل وتصبح أماً، دون أن يكون لديها القدرة على ذلك لكونها من ذوى القدرات الخاصة، قالت عبيد: “جالى المؤلف عصام الشماع الله يرحمه وقالى فيه رواية اسمها توت توت بس كل الحوار بتاعك فى الفيلم هيكون حوالى 15 كلمة فأنا بصيت له كدة قالى أيوة عشان الشخصية كذا وكذا.. ده كان عصام الشماع الله يرحمه، فبصيتله كدة وقولتله تمام أوك.. فبصلى كدة قالى موافقة؟.. قولتله طبعا”.
وأضافت عبيد قائلة: “فنزل عصام الشماع راح عند مكتب المنتج إبراهيم شوقى فقالى أنت وافقتى قولتله أيوة، فاستغرب جدا”. وتابعت النجمة نبيلة عبيد حديثها قائلة: “وبعدين أنا اخترت المخرج عاطف سالم يعمل الموضوع ده، لإن أنا بمعاشرتى لـ عاطف سالم كزوج في البدايات.. عاطف بيعشق الأطفال الصغيرة.. فهى البنت دى شخصيتى في الفيلم، شكلها الجسمانى كبير لكن عقلها عقل أطفال.. فأنا قولتله عاطف سالم اللى يعمل الشغل ده”.
وعن رد فعل المخرج عاطف سالم، قالت النجمة نبيلة عبيد: “عاطف سالم انبسط جدا لما راحله الموضوع ده فرح بيه وكلمنى.. وأنا وقتها كنت انفصلت عن عاطف سالم من مدة ولم التقِ بيه.. أنا دايما بفصل بين الشغل والعلاقات الإنسانية، وده كمخرج كان بيشغلنى زى الأطفال الصغيرة في الفيلم لإنه يعلم تماما بتفاصيل الموضوع، فهو كان بيوجهنى.. وأنا وافقت بالفيلم على طول لإنى أنا حبيت الشخصية، وكنت بروح الجمعيات اللى فيها شخصيات زى كدة، وأبص عليهم لحد ما دخلت الشخصية داخليا فيا واتعمقت معاها”.
وأكدت النجمة الكبيرة نبيلة عبيد أنها أعطت حياتها واهتماماتها على مدار عقود طويلة للفن، حيت لم يكن لديها أي شيء آخر يشغلها غيره، وقالت عبيد: “أنا كنت مدية كل حياتى واهتماماتى بالشغل أنا معنديش حاجة تانية.. وده حتى اللى حاصل في “يا ابنتى لا تحيرينى معك”، الذى أعود من خلاله خلال الفترة المقبلة للإذاعة”، مضيفة: “كنت دايما لما اشتغل مع مخرج وأبعد عنه سنة أو اتنين، وأروح لمخرج تانى وبعدين أرجعله زى مثلا حسين كمال كان دايما يقولى وحشانى قدام الكاميرا.. أكون مثلا عاملة معاه فيلمين، وأروح اشتغل مع المخرج على عبد الخالق أو المخرج عاطف الطيب يرجع يقولى أيوة كدة وحشتينى قدام الكاميرا”.
وكشفت عبيد عن طبيعة الفنانين الشباب، والتي تحب أن تراهم على الشاشة وبعضهم يلاقى إعجابها، “أنا ما أقدرش أقول حاجة زى كدة، ولكن أنا بتابع كل الحاجات اللى بيعملوها.. وبشوف مين اللى ماسكة الشخصية وبتقدمها كويس.. لكن لو قلت أسماء فيه ناس هتزعل.. وكل واحد بيجاهد عشان شغله، وأنا في الأخر بشوف المجتهدين اللى هما بيقدموا شغل كويس على الشاشة وبتابعهم”.
