بمناسبة عيد ميلاد الفنان تامر حسني، كشف الموزع الموسيقي النابلسي، في تصريح خاص لـ”وشوشة”، عن السر وراء نجاح تامر في اختيار أغانيه واستمراره على القمة، مؤكدًا أن ما يميزه هو إخلاصه للفن وحرصه على تقديم أفضل ما لديه دون السعي وراء المعادلات التجارية.
اقرأ أيضا: هيا عمرو بطلة إنقاذ مصابي مول أرابيلا تكشف كواليس اللحظات الصعبة: احترموا حرمة الميت
وقال النابلسي: “الطريف إن أنا وتامر عيد ميلادنا في نفس اليوم، ودي حاجة مميزة جدًا بالنسبة لي”.
وأضاف: “أنا بشتغل مع تامر من سنة 2022، واشتغلنا مع بعض في ألبوم عشأنجي، في أغاني كتير زي سجل تاريخ و كتير تاني ، من أول ما اتعرفنا على بعض قبل الألبوم بحوالي 3 شهور، بقينا زي الإخوات والعيلة، وعشان كده رأيي فيه واضح جدًا”.
وتابع: “تامر شخص عبقري، ودي حاجة كل الناس عارفاها، لكن بجانب ده هو شخص مثابر جدًا وبيشتغل بجد بشكل غير طبيعي. تامر بيتعامل مع كل أغنية كأنها هتبقى نجاح كبير، سواء نجحت وقت نزولها أو بعد فترة، أو حتى حققت صدى بين الفنانين، المهم بالنسبة له إنه يكون مقتنع بيها وحاسس إنها بتعبر عن حاجة حقيقية”.
وأوضح: “السر الوحيد اللي أقدر أقوله إن تامر عمره ما بيعمل أغاني لغرض تجاري، عمره ما قال لنا: عايز أغنية مقسوم، أو دراما، أو فرح، أو كلوب. هو بيسمع الأغنية اللي بتكلم قلبه، ولو حس بيها بيبدأ يشتغل عليها فورًا”.
واستكمل: “كمان تامر بيختار الأفضل من بين عدد كبير جدًا من الأغاني. ممكن نكون اشتغلنا على 25 أو 30 أغنية، وفي الآخر ينزل 10 فقط، لأنه دايمًا عايز يقدم للجمهور أفضل أفضل حاجة، وميرضاش يقدم أي مستوى أقل من 100%”.
اقرأ أيضا: أحمد عادل لـ”وشوشة”: تامر حسني مهتم بكل تفصيلة.. وهذا سر نجاح اختياراته الغنائية
وأكد النابلسي أن تامر حسني من أكثر الفنانين اجتهادًا في الوسط الفني، قائلًا: “حقًا يقال، تامر أكتر واحد مجتهد اشتغلت معاه في الـصناعة كلها، وأكتر واحد مركز في شغله، ودايمًا موجود، وكمان بيسمع لكل الناس”.
واختتم حديثه قائلًا: “تامر مش بيحكم على الأغنية باسم صاحبها، ممكن توصله رسالة من رقم ميعرفوش فيها 15 أغنية، وهيقعد يسمعهم واحدة واحدة، وياخد رأيه في كل أغنية. بالنسبة له كل الموضوع هو الأغنية نفسها، مش شخصية اللي بعتها، وده اللي بيديله فرصة يكتشف مواهب جديدة، وده في رأيي أحد أهم أسباب تميزه واستمراره”.
اقرأ أيضا: إشغالات فنادق مرسى علم تتجاوز 90% بدعم السياحة الأوروبية
