حرصت الفنانة ليلى زاهر على توضيح حقيقة التصريحات التي أدلت بها خلال ظهورها في برنامج AB Talks، والتي أثارت تفاعلًا واسعًا عبر مواقع التواصل الاجتماعي، مؤكدة أن هناك أجزاء من الحلقة تم حذفها، ما تسبب في فهم بعض تصريحاتها بمعانٍ مختلفة عن المقصود منها.
اقرأ أيضا: محامي دان آدم: أبناء حسام حسن تعدوا على زوجته في الساحل
وقالت ليلى زاهر في استوري عبر حسابها الرسمي على موقع إنستجرام:”بحترم وبقدر ردود الأفعال واهتمامكم بس حابة أوضح كام نقطة لأن في أجزاء من الحلقة اتقطعت واتاخدت بمعاني غلط”.
ليلى زاهر تكشف كواليس تصوير «AB Talks»
وأضافت ليلى زاهر:”تصوير حلقة AB Talks حصل وأنا في أواخر شهور الحمل، قبل التصوير إدارة أعمالنا بلغت فريق البرنامج إننا هنوصل متأخر لأني تعبت شوية، ولما وصلنا اعتذرنا لأنس وفريق البرنامج بالكامل على التأخير”.
وتابعت:”واحنا داخلين الاستوديو قلت لهشام إني لسه تعبانة وطلبت منه يساعد أكتر في إدارة الحوار لأني كنت تعبانة ولأن طاقتي بشكل عام أقل الفترة دي وده شيء طبيعي”.
ليلى زاهر توضح حقيقة موقف السفر
وعن موقف السفر الذي تحدثت عنه خلال الحلقة، قالت ليلى زاهر:”موقف السفر حصل فعلا! لكن بعدها لوحده اتكلم معايا وقالي إنه انتبه إنه اتصرف غلط بحكم طريقة نشأة شباب كتير وإنه نوع تصرفات محتاج تصحيح وعلاج وده كان تكملة كلامه الموجود في الحلقة الكاملة”.
وأضافت:”والحقيقة إن من يومها محصلش موقف مشابه، وفكرة إن راجل ياخد باله ويحلل ويصارح بالمشكله ويتغير عشانك هو أكيد شيء يحترم”.
ليلى زاهر: أنا اخترته وهو اختارني
وتطرقت ليلى زاهر إلى حديثها عن علاقتها بزوجها هشام جمال، قائلة:”أنا اخترتك! وأنا كمان اخترته.. لأن كتير من أسبابنا متشابهة.. أكيد بحبه عشان طريقة تعامله معايا وكمان تعاملاته في حياته ومع الناس، وأكيد عشان شايفاه الأحسن والأنسب والأحلى في كل حاجة”.
وأوضحت أن حديثها جاء في سياق نقاش حول الغيرة، مشيرة إلى أن هشام جمال كان يؤكد لها أنه لا يرى امرأة أفضل منها، وأن الجزء المتداول من الحلقة لم ينقل الحديث كاملًا.
ليلى زاهر: كل أيامي معاه حلوة
وأكدت ليلى زاهر في الاستوري أن علاقتها بهشام جمال بدأت منذ 4 سنوات، وأنهما متزوجان منذ نحو سنة ونصف، قائلة:”علاقتي ب هشام بدأت من ٤ سنين، وبقالنا حوالي سنة ونص متجوزين وأنا أكتر واحدة عارفة تفاصيل علاقتنا وحياتنا واتفاقاتنا اللي بنحترمها وبتمشي علينا إحنا الاتنين”.
اقرأ أيضا: تامر أمين يدافع عن حسام حسن بعد أزمة الساحل: «فجأة الناس بتتشفي فيه»
وأضافت:”لكن كمان أنا عندي وجدي واخواتي وصديقات قريبين مني جدا، كلهم سيدات بخبرات مختلفة شايفين علاقتنا من قريب وعايشين تفاصيل كتير منها، وكلهم بيحترموه وبيحبوه وبيبدعونا نكمل بنفس التفاهم اللي إحنا فيه”.
وتابعت:”أنا بتكلم عن شخص من يوم فرحنا لحد النهارده كل أيامي معاه حلوة، بيعاملني بكل حب واحترام وتقدير، شخص من أول يوم في حملي مسابنيش في تعب، ولا سفر لشغلي، ولا زيارة دكتور، لأنه حاططني أولوية في حياته وقدر يحتويني بتغيرات مشاعري وأحاسيسي خلال تجربة جديدة علينا إحنا الاتنين”.
ليلى زاهر تستعد لاستقبال طفلتها الأولى
واختتمت ليلى زاهر استوري حديثها عن علاقتها بزوجها قائلة:”أنا أقدر أحكم على اللي أنا عايشاه حاليا.. وهو إننا عدينا أول مرحلة من الجواز بيتقال عليها من أصعب المراحل، بحب وتفاهم وأتمنى نكمل كده وأحسن إن شاء الله بعيداً عن التنبؤات المتشائمة المتأثرة بانتشار العلاقات السامة واللي هيلاقوا دايما زاوية تقلب أو تحور أي شيء إيجابي لسلبى حتى الكلام اللي أنا بكتبه دلوقتي”.
واختتمت حديثها بطلب الدعاء لها ولزوجها، قائلة:”ربنا يكتب لكل حد السعادة والراحة في حياته بطريقته وإن شاء الله تشوفونا بعد سنين أكتر، ونكون مبسوطين ومتفاهمين أكتر، وأقدر أنا كمان أخليه سعيد قد ما هو بيخليني مبسوطة في حياتي، أخيرا هطلب دعواتكم لينا وإحنا بنعيش واحدة من أسعد مراحل حياتنا وبنستعد نستقبل أول مولودة لينا إن شاء الله “.
اقرأ أيضا: زلزال إندونيسيا.. ارتفاع حصيلة الضحايا إلى 47 شخصا وتضرر مطارات – الأسبوع
