كارولين عزمي لـ"وشوشة": كواليس العمل مع كزبرة وأحمد غزي كانت تحفة

أعربت الفنانة كارولين عزمي عن سعادتها بالمشاركة في فيلم محمود التاني مؤكدة أنها تحمست للعمل منذ اللحظة الأولى خاصة مع وجود عدد كبير من أبناء جيلها ضمن فريق الفيلم، وعلى رأسهم أحمد بحر الشهير بـ”كزبرة” وأحمد غزي، إلى جانب المؤلف إياد صالح والمخرج عبدالعزيز النجار والمنتج طارق الجنايني.

وقالت كارولين عزمي في تصريح خاص لـ”وشوشة”، على هامش حضورها العرض الخاص لفيلم محمود التاني:”أنا اتحمست لكل حاجة في الفيلم، الأستاذ طارق الجنايني طبعًا، وكزبرة وغزي من جيلي، وأنا عايزة أشتغل مع جيلي، وكمان إياد صالح المؤلف وعبدالعزيز النجار المخرج، فبصراحة كل حاجة في الفيلم حمستني”.

وأضافت كارولين عزمي قائلة:”أنا شايفة إن إحنا جيل مهم جدًا وقوي جدًا، وجيل قدر يثبت نفسه، فكنت حابة أشتغل مع جيلي لحد ما جات الفرصة، والحمد لله قدرت أكون جزء من الفيلم”.

كارولين عزمي تكشف تفاصيل مشاهدها مع كزبرة

وتحدثت كارولين عن تعاونها مع أحمد بحر كزبرة خلال أحداث الفيلم، مشيرة إلى أن الجمهور سيشاهد العديد من المواقف الكوميدية التي تجمعهما، قائلة:”المشاهد اللي بتجمعني بكزبرة هتشوفوا فيها حاجات كتير، وبضحك بجد”.

كما أشادت بأجواء العمل والعلاقات التي جمعت فريق الفيلم خلال التصوير، موضحة:”الحمد لله معنديش ناس وحشة، الناس الحلوة يلا تعالوا في اللي جاي”.

وعن كواليس التصوير، قالت كارولين عزمي :”والله الكواليس كانت تحفة وعشان كده هتشوفوها في الفيلم، لأن جوه الفيلم باين أوي حبنا لبعض والكيميا اللي ما بينا”.

كارولين عزمي تكشف أعمالها المقبلة

وعن أعمالها الحالية، كشفت كارولين عزمي أنها تقضي وقتها في الساحل الشمالي، إلى جانب مشاركتها في مسرحية مع الفنان أشرف عبدالباقي، قائلة:”أنا مقضياها في الساحل الشرير، وبشارك في مسرحية مع أشرف عبدالباقي”.

وتطرقت إلى المنافسة والإيرادات، مؤكدة أن تركيز فريق الفيلم كان منصبًا على تقديم أفضل ما لديهم، وليس على تحقيق الإيرادات، قائلة:”والله إحنا اجتهدنا، محدش فينا مركز في إيرادات، كل واحد عمل اللي عليه وزيادة، وكل واحد اجتهد، فالتوفيق بتاع ربنا، وأتمنى إن إحنا كلنا ننجح”.

هل تشارك كارولين عزمي في رمضان 2027؟

وعن خطتها للمشاركة في الموسم الرمضاني المقبل، أوضحت كارولين عزمي أنها تلقت بالفعل عددًا من العروض، لكنها تفضل الانتظار لحين معرفة ردود أفعال الجمهور على فيلم محمود التاني قبل اتخاذ قرار نهائي.

وقالت:”في كذا حاجة اتقدمتلي، بس أنا مستنية أشوف الفيلم هيعمل إيه، وبناءً على كده همضي، لكن غير كده مش هعرف أمضي دلوقتي أي حاجة. أنا ملتزمة الصمت ومستنية أشوف الفيلم وصداه”.

وأضافت:”في عرض فيلم تاني، فلو دخلت الفيلم التاني بنسبة كبيرة مبقاش موجودة في رمضان، لكن لو عرفت أوفق بين الاتنين طبعًا دي حاجة تشرفني”.

كارولين عزمي: المسرح أصعب من السينما والتليفزيون

واختتمت كارولين عزمي حديثها بالكشف عن رأيها في صعوبة العمل بين السينما والمسرح والتليفزيون، مؤكدة أن المسرح يمثل التحدي الأكبر بالنسبة لها، بسبب التفاعل المباشر مع الجمهور.

وقالت:”السينما أصعب؟ لا، المسرح أصعب حاجة، لأن رد الفعل بتاخده وقتي، السينما والتليفزيون بتاخده بعدين”.