الأخبار

الأهلي نيوز : الرد علي السؤال الصعب أشمعني أبوتريكة ؟

الأهلي نيوز : اشمعنى أبو تريكة، وليه الهتاف ليه هو ومش لأحمد حسن ولا حسام حسن ولا الحضري،

بما إنهم كلهم لعيبة تاريخيين للمنتخب ،ليهأبو تريكة؟ لإن التعامل معاه حاليًا مش عشان هو كان لاعب عظيم،

أه دا طبعًا جزء رئيسي من شعبيته اللي بتزيد  كل ما السنين بتعدي وهو بعيد عن الملعب،

بس الحالة اللي الجمهور فيها مع تريكة دي سببها مواقفه معاهم، وإنه فعلًا كان واحد منهم ومشاكلهم مشكاله مش شعارات ولا كلام متزوق.

الأهلي نيوز : أبوتريكة صاحب مواقف تاريخيه مع الجماهير

 

الأهلي نيوز : أبو تريكة الوحيد اللي وقف جنب أهالي الـ 74 اللي ماتو في بورسعيد، ووقف

جنبهم هنا مش معناها شارة سودا أو ألبس تيشيرت رقم 74 لإن كل دي مواقف جميلة

وإنسانية بس مينفعش تتسمى وقوف جنب أهالي الشهداء، أبو تريكة قدم مساعدات

مالية للكل بلا استثناء، وزارهم ووقف جنبهم وخفف عنهم، وكل دا كان بيتعرف بالصدفة

لإنه كان بيتعمد يعمله في الخفاء عشان هو نيته إنه يقف جنب الناس فعلًا، ولولا السوشيال ميديا وحكاويها مكناش عرفنا الحاجات دي فعلًا .

 

الأهلي نيوز : أحمد الطيب حكى إن أبو تريكة راح لأهل كريم جونيور السويس، وإنه عرف

إن أبو تريكة كان موجود بعد ما مشي لإنه جه متخفي عشان محدش يعرف، أم أنس

محيي الدين قالت السنة دي إن أبو تريكة الوحيد اللي واقف جنبنا من يوم الحادثة لحد النهاردة،

أحد أفراد ألتراس الزمالك حكى عن موقف أبو تريكة مع عمرو حسين، وقال إنه في عز ما

لعيبة الزمالك التاريخيين كانوا ولا كإن حاجة حصلت أبو تريكة هو اللي وقف جنبهم وجنب

أهل عمرو، والكلام دا اتقال من شهر تقريبًا لما الشخص دا حكاه، مع إن عمرو الله يرحمه مات من 6 سنين.

 

الأهلي نيوز : أبو تريكة الوحيد اللي رفض يلعب على دم الناس اللي ماتت، ورفض يلعب

السوبر المصري اللي بعد حادثة بورسعيد، رفض إن النشاط يرجع من غير ما حق الناس

اللي ماتت يجي ولا كإن حاجة حصلت، أبو تريكة الوحيد اللي حاول يخبي كل الحاجات دي،

زي ما كان بيخبي الأجندة اللي كان فيها أسامي الناس اللي بيساعدها ماديًا وهو لاعب،

واللي شافها أحمد شديد قناوي بالصدفة وطلع حكى الوقف.

الأهلي نيوز : أبوتريكة دائم المساندة للمظلومين والفقراء

 

الأهلي نيوز : سبحان الله كل اللي أبو تريكة كان بيعمله لله اتحكى عنه في مواقف كلها صدف،

وثائقي من فيلجول الناس تحكي فيه كل حاجة، بوست على السوشيال ميديا الناس تشيره فيوصل للكل،

موقف على الهواء للاعب لعب جنب أبو تريكة فيحكيه صدفة، أبو تريكة هو الشخص الساذج في روايات والمثالي في روايات أخرى،

المهم إنه مش حاجة تالتة، وإنه مش زيه زي الباقي.

 

الأهلي نيوز : أبو تريكة بعد كل دا الوحيد اللي اتحط على قوائم الإرهاب، وبعد ما كان هو

الحاجة الوحيدة اللي بتهون على الناس الظلم اللي وقع عليهم، حسوا إنهم لازم يردوا

الجميل ويكونوا الحاجة اللي بتهون عليه الظلم، الموضوع إنساني بحت، فمتحاولش تاخده

لحتة تانية وتقولي اشمعنى هو ومش فلان اللاعب ولا فلان المحلل ، محمد أبو تريكة

اللاعب عظيم وأسطوري، محمد أبو تريكة الإنسان إستثنائي، معادلة عمرك ما هتلاقيها

غير معاه هو، عشان كدة هتفضل معاملته استثنائية من الناس للأبد ومهما حاولوا يصوروه كشيطان.

الوسوم

اترك تعليقاً

لن يتم نشر عنوان بريدك الإلكتروني.

زر الذهاب إلى الأعلى
إغلاق